काठमाडौं । मनाङ, भक्तपुर, झापा, बारा, सप्तरी, सर्लाही र चितवनका छुट्टाछुट्टै स्थानमा भएका सवारी दुर्घटनामा परी १३ जनाको मृत्यु भएको छ ।
प्रहरीका अनुसार मनाङ नासों गाउँपालिका-२ खोत्रोस्थित सडकमा ध.१ ख ५९२ नम्बरको ट्रक सडकबाट करिब ५० मिटर तल खसेर दुर्घटना हुँदा ६ जनाको मृत्यु भएको छ । मृत्यु हुनेहरुमा ट्रकमा सवार नासो गाउँपालिका-४ बस्ने ३५ वर्षीया मनिषा गुरुङ लगायत ३ जनाको घटनास्थलमै, २ जनाको जिल्ला अस्पताल लमजुङ र १ जनाको मेडिकल कलेज भरतपुरमा उपचारको क्रममा मृत्यु भएको हो । दुर्घटनामा घाइते भएका अन्य २ जनाको सोही अस्पतालमा उपचारको भइरहेको छ ।
यसैगरी भक्तपुर सूर्यविनायक नगरपालिका-१० चितापोलस्थित सडकमा बा.४ ख ९८१० नम्बरको टिपरले मे.८ प ८३९७ नम्बरको मोटरसाइकललाई शनिबार दिउँसो ठक्कर दिँदा मोटरसाइकलमा सवार काठमाचौं हात्तीगौंडा बस्ने सोलुखुम्बु दुधकुण्ड गाउँपालिका-११ घर भएकी ५९ वर्षीया सिता कुमारी कार्कीको मृत्यु भएको छ । दुर्घटनामा घाइते भएकी उनको भक्तपुर अस्पतालमा उपचारको क्रममा मृत्यु भएको हो । टिपर चालकलाई प्रहरीले नियन्त्रणमा लिएको छ ।
यसैगरी झापा दमक नगरपालिका-४ चिया बगानस्थित सडकमा प्रदेश १-०२-००१ क १०८२ नम्बरक टिपरले प्रदेश १-०२-०४४ प ८१३३ र को.२८ प ११३६ नम्बरको मोटरसाइकललाई शनिबार साँझ ठक्कर दिँदा २ जनाको मृत्यु भएको छ । मृत्यु हुनेहरुमा प्रदेश १-०२-०४४ प ८१३३ नम्बरको मोटरसाइकलमा सवार मोरङ रतुवामाई नगरपालिका-८ बस्ने २३ वर्षीय अनिष कोईराला र मोटरसाइकल चालक २३ वर्षीय निरन बस्नेत रहेका छन् । दुर्घटनामा घाइते भएका अनिषको लाईफ लाईन अस्पताल दमकमा र बस्नेतको बीएण्डसी अस्पताल बिर्तामोडमा उपचारको क्रममा मृत्यु भएको हो । दुर्घटनामा घाइते को.८ प ११३३ नम्बरको मोटरसाइकल चालक र सोही मोटरसाइकलमा सवार २ जनाको निम्स अस्पताल दमकमा उपचार भइरहेको छ । टिपर चालकलाई प्रहरीले नियन्त्रणमा लिएको छ ।
यसैगरी बारा आदर्शकोटवाल गाउँपालिका-४ ईनर्वामालस्थित सडकमा ना.८ ख ३४५६ नम्बरको टिपरले बीआर ०५ के ०९६ नम्बरको मोटरसाइकललाई शनिबार साँझ ठक्कर दिँदा मोटरसाइकल चालक रौतहट फतुवाबिजयपुर नगरपालिका-८ बस्ने ३६ वर्षीय अजय यादवकी ७ वर्षीया छोरी आकृती यादवको घटनास्थलमै मृत्यु भएको छ । दुर्घटनामा घाइते भएका मोटरसाइकल चालकलाई कलैया अस्पताल हुँदै थप उपचारका लागि बिएण्डबि अस्पताल ललितपुरतर्फ पठाइएको छ । हाल फरार टिपर चालकलाई प्रहरीले नियन्त्रणमा लिएको छ ।
यसैगरी सप्तरी राजविराज नगरपालिका-१५ खाडो पुल नजिक सडकमा अनटेस्ट लेखिएको मोटरसाइकल अनियन्त्रित भई शनिबार साँझ दुर्घटना हुँदा मोटरसाइकल चालक तिलाठी कोईलाडी गाउँपालिका-४ बस्ने १५ वर्षीय विवेक कुमार मण्डलको मृत्यु भएको छ । दुर्घटनामा घाइते भएका उनको गजेन्द्र नारायण सिंह अस्पताल सप्तरीमा उपचारको क्रममा मृत्यु भएको हो । घाइते भएका मोटरसाइकलमा सवार हनुमाननगर कंकाली नगरपालिका-१० इनर्वा बस्ने १५ वर्षीय कौशल मंडललाई सोही अस्पताल हुदै थप उपचारको लागि विराटनगरतर्फ पठाइएको छ ।
यसैगरी सर्लाही, बामगती नगरपालिका-५ स्थित सडकमा बा.७० प ६२८ नम्बरको मोटरसाइकल अनियन्त्रित भई पल्टिएर शनिबार साँझ दुर्घटना हुँदा मोटरसाइकल चालक सोही ठाउँ बस्ने ३८ वर्षीय दिल बहादुर थापाको मृत्यु भएको छ । दुर्घटनामा गम्भीर घाइते भएका उनलाई उपचारका लागि हरिवनतर्फ लैजाने क्रममा बाटोमै मृत्यु भएको हो ।
यसैगरी चितवन, भरतपुर महानगरपालिका-४ यज्ञपुरीचोकस्थित सडकमा ना.७ ख ५९८८ नम्बरको टिपरमा ना.५० प ९८४८ नम्बरको मोटरसाइकल ठोक्किएर शनिबार राति दुर्घटना हुँदा मोटरसाइकल चालक सोही महानगरपालिका-१० आईसल्याण्ड जंगल रिसोर्टमा काम गर्ने भोजपुर ट्याम्केमैयुम गाउँपालिका-३ घर भएका १९ वर्षीय नियामा ओहाङ राईको मृत्यु भएको छ । दुर्घटनामा घाइते भएका उनको जिल्ला सरकारी अस्पताल भरतपुरमा उपचारको क्रममा मृत्यु भएको हो । टिपर चालकलाई प्रहरीले नियन्त्रणमा लिएको छ ।
दुर्घटनाका सम्बन्धमा स्थानीय प्रहरीले थप अनुसन्धान गरिरहेको जनाएको छ ।
-1755798403.JPG)
-1755801150.JPG)
-1755798396.JPG)
-1755798403.JPG)
-1755801150.JPG)
-1755798396.JPG)
