काठमाडौं । बढुवा समितिले आइतबार मध्यरातमा प्रकाशित गरेको बढुवा सिफारिस सुचीमा नेपाल प्रहरीका चार महिला प्रहरी निरीक्षकहरु प्रहरी नायब उपरीक्षक (डीएसपी) मा बढुवाको लागि सिफारिस भएका छन् ।
समितिले आइतबार मध्यरातमा नेपाल प्रहरीका ६० जना प्रहरी निरीक्षक (इन्स्पेक्टर) लाई प्रहरी नायब उपरीक्षक (डीएसपी) मा बढुवाको लागि सिफारिस गरेको छ ।
नेपाल प्रहरीमा रिक्त ६० प्रहरी नायब उपरीक्षक (डीएसपी) को लागि बढुवाको प्रतिस्पर्धामा रहेका सयौंको भिडमा पाँच महिला प्रहरी अधिकृतले दाबेदारी प्रस्तुत गरेका थिए । प्रहरी निरीक्षकहरु पुर्णिमाकुमारी चन्द, शर्मिला गुरुङ, रुपा लाबुङ, चन्चला श्रेष्ठ र कोपिला चुँडाल प्रहरी नायब उपरीक्षक (डीएसपी) बढुवाको प्रतिस्पर्धी थिए। आइतबारको बढुवा सिफारिस सुचीमा चन्द, गुरुङ, श्रेष्ठ र लाबुङ समेटिए भने चुँडाल बढुवामा छुटेकी छन् ।
डीएसपी बढुवाको लागि सिफारिस भएका इन्स्पेक्टरहरु चन्द, गुरुङ, लाबुङ र श्रेष्ठ २०६७ भदौ २४ मा प्रहरी निरीक्षकबाट सिधै नेपाल प्रहरीमा प्रवेश गरेका अधिकृत हुन् भने बढुवामा छुटेकी चुँडालले २०५८ असार १ मा प्रहरी सहायक निरिक्षक हुँदै २०६७ भदौ २४ मा आन्तरिक प्रतिस्पर्धाबाट खुला समुहमा प्रहरी निरिक्षकमा नाम निकालेकी थिइन् ।
फिल्डमा समेत उत्कृष्ट क्षमता प्रदर्शन गर्दै आएकी पुर्णिमा चन्द हाल महानगरीय प्रहरी प्रभाग पुल्चोक ललितपुरको प्रमुख छन् । तीन बर्ष अगाडी महानगरीय प्रहरी प्रभाग गोङ्गबुको सफल कमाण्ड सम्हालेकी चन्द र महानगरीय प्रहरी प्रभाग बलम्बुको कमाण्ड गरेकी शर्मिला गुरुङ निडर र व्यावसायिक छविका प्रहरी अधिकृतमा गनिन्छन् ।
त्यसो त हाल महानगरीय प्रहरी प्रभाग मंगलबजार पाटनको नेतृत्वमा रहेकी चन्चला श्रेष्ठ र करिब डेढ बर्ष अगाडी महानगरीय प्रहरी प्रभाग सानेपा ललितपुरको सफल कमाण्ड गरेकी रुपा लाबुङ पनि व्यावसायिक प्रहरी अधिकृतको रुपमा परिचित छन् । पछिल्लो समय सुरक्षा निकायमा महिलाको आकर्षक बढ्दै गएको आइतबारको बढुवा सिफारिस सुचीले समेत प्रष्ट पार्छ ।
नेपाल प्रहरीको जनपद समुहतर्फ प्रहरी निरीक्षक (इन्स्पेक्टर) भन्दा माथिल्लो तहको मात्रै कुरा गर्दा प्राविधिक प्रहरी अतिरिक्त महानिरीक्षक (एआईजी) आशा सिंह, प्रहरी वरिष्ठ उपरीक्षक (एसएसपी) पुजा सिंह, मिरा चौधरी, किरण बज्राचार्य, दुर्गा सिंह, किरण राणा, प्रहरी उपरीक्षक (एसपी) गङ्गा पन्त, तारादेवी थापा, रन्जु सिग्देल, प्रहरी नायब उपरीक्षक (डीएसपी) बसुन्धरा खड्का, दिप्ती कार्की, अन्जना श्रेष्ठ, छिरिङ किप्पा लामा र चिनिमाया तामाङ महिलाको प्रतिनिधित्व गर्दै नेपाल प्रहरीमार्फत राष्ट्रसेवामा खटिरहेका छन् । उनीहरुमध्ये एसएसपी सिंह संघीय प्रहरी इकाई कार्यालय पोखराको प्रमुखको रुपमा कार्यरत छिन् । त्यस्तै एसपी पन्त पर्सा र सिग्देल सिन्धुलीको प्रहरी प्रमुखको भुमिकामा छन् ।
हेर्नुस बढुवा सूची
_(1).JPG)
.jpg)
